|
Koudeta peyi sivilize, gwo koze!
Tout kote nan lemonn branche pou obsève
Latwoublay blayi nan yon kokenn eleksyon
Ki pral potomitan anndan tout desizyon.
Yon siklòn politik balize Florida
Bilten Papiyon gentan vin pou gate sa
Batay legal pou rekontaj vot yo pete
Bagay yo mele kay Tonton Sam tout bon vre!
Gwo koze, koudeta peyi sivilize
Pèp ki pa te byen vote ap rele anmwe
Rezilta eleksyon sa a dire bon bout tan
Poudi pa ta gen magouy pou koupe devan?
Lobo pete devan grenn je lemonn antye
Leson tounèf pou ti peyi soudevlope
Kokenn batay ant kandida pou pran pouvwa.
Ala tray, demokrasi tonbe nan koma!
(© Emmanuel W. Védrine)
koleksyon: Kri Pou Liberasyon |